مش باقي مني
غير شوية لحم في كتافي
بلاش يتبعتروا في البحر
بلاش يتحرقوا في قطر الصعيد
في العيد
بلاش لكلب الصيد تناوليهم
خدي اللي باقي من الأمل فيهم
وابني لي من عَظمهُم
في كل حارة
مقامْ
وزوريني مرة
وحيدة
لو كل 2000 عام
ألم الجراح يتلمّ
مش باقي مني غير شوية دم
متلوثين بالهمّ
مرين وفيهم سمّ
كانوا زمان شربات
والنكتة سكرهم
شربتهم الخفافيش
في قلب أوكارهم
مش باقي مني غير شوية دم
ما اقدرشي
اسقيكي مواجعهم
وبرضه ما اقدرشي
ارميكي وأبيعهم
يمكن في مرة تعوزي تطلبيني شهيد
هاحتاج يوميها الدم
يمضي على شهادتي
...
